簡易1人餐 - 十勝燒汁黑豚飯

一天的工作後已累得半死，所以簡易1人餐宗旨只得一個字 "快"！希望大家也可在此交流烹飪心得。

日本美食總是另人念念不忘。還記得雪柜還有好友送贈的十勝燒汁同上次在元朗買的美國黑豚粒。今晚一於整番個老翻十勝燒汁黑豚飯頂一頂癮先。

十勝燒汁黑豚飯

   

材料及分量：(男仔分量，女仔可以自行减半)

白飯：1大碗

美國黑豚粒：約500克

洋葱：半個切絲

菜遠：適量

十勝燒汁：3湯匙

水：2湯匙





步驟：

首先煮飯。筆者家中電飯煲需時約30-45分鐘。

醃肉。美國黑豚粒解凍後加黑胡椒碎(兩叁下)、盬1/4茶匙、醬油1/4茶匙，酒1-2茶匙、生粉少許。混好後才加少許油。再攪拌備用。醃肉時間最少應有15分鐘。

清洗時菜，今早的芥蘭用得著了。煲滚水下油盬各少許，白灼伴碟備用。

燒紅鑊，下油加熱，落洋葱快炒幾下，轉中火加少許盬、少許水，再炒至有洋葱香味及見軟身，盛起備用。

原鑊再加些少油，加熱至油大熱，落黑豚粒並確保每粒黑豚平放於鑊上略煎，約半分鐘後反轉再煎至外層轉熟的顏色。急炒幾下，加十勝燒汁同水。轉慢火煮。洋葱回鑊覆蓋著黑豚再煮至醬汁濃度適中，略炒、試味。即可上碟伴飯同吃。

小心得：

如果你的黑豚是優質的話，可以唔落酒。

要判斷黑豚肉熟唔熟，由其是厚切或切粒都是要講經驗。但大家只需要用眼去望、手去感覺就可。首先外表轉了色未必熟透，但未轉晒色一定未熟。接著可用鑊剷輕按肉粒。如太有彈性則未熟透，要再煮。生肉富有彈性。但全熟透的肉就欠逢。生熟程度就看看肉的彈性去判斷。如果你的黑豚是優質的話，吃89成熟是無問題的，否則的話，熟透一點比較好。

Lawrence

簡易1人餐 - 白汁粟米午餐肉粒飯

一天的工作後已累得半死，所以簡易1人餐宗旨只得一個字 "快"！希望大家也可在此交流烹飪心得。

煮什麼好呢？就由小朋友食物開始。

白汁粟米午餐肉粒飯

材料及分量：(男仔分量，女仔可以自行减半)

白飯：1大碗

粟米：1小碗

午餐肉：厚切3塊切粒

芥蘭莖 : 5、6條切粒

鮮奶：1盒

牛油：1小塊

麵粉：1/3湯匙

步驟：

1. 首先煮飯。筆者家中電飯煲需時約30-45分鐘。

2. 清洗芥蘭。只要莖，可用刨將較硬的外皮刨掉、切粒。葉就留起下次用或當油菜好了。

3. 煲少量水，水滚後將粟米飛水，去除雪味。水翻滚後，盛起備用。

4. 原煲水，將芥蘭莖粒也飛水。今次不用煮到水翻滚，否則芥蘭會煮過了火不爽脆。盛起備用。

5. 洗煲、加熱、離火、加入牛油等待全部溶化、落麵粉混合成糊狀、落鮮奶、但留翻約1/5盒備用、用中慢火加熱。需要久不久攪動。

6. 同一時間，慢火略煎香午餐肉。

7. 鮮奶加熱後會慢慢變濃，因牛油麵粉糊也會慢慢溶於奶中。此時加入粟米及調味、不需太喊。一直煮直至白汁微微厚身、加入芥蘭莖粒同午餐肉粒，完全混合後再煮至喜好程度上碟伴飯同吃。

小心得：

小心牛油易焦，一定要離火煮溶。

白汁離火後會繼續變濃些少，所以留翻些少奶備用。太厚身就離火加奶直志喜愛程度。

"飛水"：將食物在滾水中煮一刻的意思。唔同食物有唔同原因。如急凍食物就去雪味、煲湯肉骨就可去掉多餘脂肪同羶味、急凍蝦仁也可飛水，用於减少水份，妙旦時就更得心應手啦。

最好用易潔煲煮，不易焦及清洗容易。

Lawrence

上環禧利街漢記潮洲粉麵餐廳 - Part 2

筆者從四月開始寫文章到現在，轉眼間一個月有多。能夠出了十篇，好開心，當中得到很多朋友、好友的報料、鼓勵和支持，在此衷心感謝。我定會繼續努力！

言歸正傳。漢記係我第一篇文章的主題，今次第十一篇，係時侯再到此店一遊。有了上次經驗，今次晨早衝落街，就來個早飯吧！時間尚早，但店內已有四五人。香港地，識途老馬多的是。上回情景歷歷在目上環禧利街漢記潮洲粉麵餐廳 - Part I，餐牌都懶得睇。拿拿聲，阿姐：唔該我要爽腩河同坑腩麵！驚死遲些要什麼都是一句公式的答案－賣晒！到時真的火都黎！唔理三七二十一，叫咗先，睬佢都傻！哈！呢一句好鬼熟，係邊度聽過呢？哈哈！記起了！身邊好友的口頭禪。真是近朱者赤！

一刻間，兩碗粉麵一齊來。今次有的放矢，正正是為了這鎮店孖寶而來。完全唔理得碗麵浸
咗幾耐，影相要緊！因為坑腩味濃，筆者首先搞定了碗爽腩先。一貫慣例，先來湯一口。好喎！牛腩味濃但湯本身唔會係咸死你嗰隻。最緊要的是那匙芫茜，再混入少許唐芹，不得了。一入湯中，一熱、香爆！

好啦，登登登登！第一寶出場。爽腩。飲食冷知識出場－"爽腩又名磞沙腩或蝴蝶腩，是牛肚皮下的腩位" (資料由漢記餐牌提供) 。一碗只有三件，真是物以罕為貴！每件爽腩都有層筋膜附著。我最喜愛呢一嚿。你看看，腩肉在筋膜中間是多麼美麗。晶瑩的筋膜絕對唔肥，一口咬下，首先是爽脆的筋膜，軟滑的腩肉接著衝進你的口腔，最後又是爽脆的筋膜作結終。筆者鄉下仔一名未食過爽腩，口感好得意！

到二寶出場啦！飲食冷知識又出場－"坑腩是牛胸前八支骨的腩肉，牛味最濃！" (資料由漢記餐牌提供) 。正因味濃，所以壓後！一碗四件。坑腩只在上半部份有筋膜，下半截是腩肉居多。放一件入口中，由呢一刻開始請緊緊將你的口合上直到咀嚼完為止，完完全全感受一下那股强勁的牛腩味左你的口腔內爆發！腩肉好入味、好軟滑，絕對唔係鞋熠熠。筋位冇肥的感覺。好吃！在此，好多謝Michael San 教會筆者這樣享受天下各樣美食。

埋單共銀$72.00。筆者最鐘意貪得意，我就覺得值，唔知你呢？

温馨提示兩則：

1. "＋二點前唔到，可能乜都冇！"

2. 筆者繼續發揮辦熟本色去索料，阿姐："點解餐牌冇淨坑腩嘅？"阿姐話：有呀！同淨爽腩一樣。賣$90.00。冇寫出來啫，少丫嗎！"咁我可唔可以留？"好難做架，個個黎親都係揾呢D嘢食。你早D黎咪得囉！"

最後在本篇結速時好想在此多謝好友贈送了一套手寫板給筆者。完成了這篇文章後基本上適應了操作，好好用！省時了！會繼續努力！

Lawrence

上環禧利街 O Green Cafe 有機餐廳

還有約兩週多時間就要暫別呢個工作了四五年的地方。時間真的走得太快，如果能在呢刻停一下，你話幾咁美好呢！正當白日好夢正濃的時候，突然想起了今日約了飯桶皇后午飯。首先真要多謝她帶路。其實筆者都有好幾次經過此店，但每次都未有機會一試。今日機會終於到啦。店鋪座落於禧利街，上環午飯時段的黃金地帶。

店鋪不太大，十數個座位。我們在門外等了約十分鐘才有位。香港人真越來越講健康飲食。接待員安排了一個靠近廚房的位置，筆者最喜歡，可以一睹內裡運作。說也奇怪，兩三個穿著整齊廚師服裝的都是女性，唯一一個男的在扒爐前忙著、但他是廚房內唯一冇製服的。有趣！

今日我們選了一個午餐、另加了一個沙律同有機花茶。餐湯先到。雜菜湯加入了香草。賣相不錯。飯桶皇后怕西湯，冇問題，筆者頂。湯入口，你唔會搵到厚厚的忌廉，清淡中會找到蕃茄同雜菜的味道。再加少許香草，有水準。

接著，有機雞胸凱撒沙律出場！羅馬生菜好新鮮，再放入些少麵飽粒同煙肉碎，好味！最難得雞胸唔鞋，時間剛好！

第二個主菜都係沙律。有鱸魚同荳腐配雜錦沙律菜。好有新鮮感。呢個沙律有些少特別，廚師加了一種叫苦豆的，吃時你會吃到一種苦澀味。當然，鱸魚係有水準的。外皮酥脆，內裡嫩滑。唯一係魚味不太濃。荳腐處理得更好！外層香脆、內裡荳味濃厚。好味。

飯桶皇后喜歡甜品，叫了一個有機荳腐朱古力凍。好軟滑。集齊了各種材料再加香蕉，完全無想過荳腐可以咁做甜品。

最後是有機花茶同無咖啡因咖啡。花茶清清地，最合適在下午茶時段慢慢嘆。無咖啡因咖啡，可能就係冇加入咖啡因，筆者覺得嘛嘛地啦！

整體而言，看得出係用心去制作。

店內放了很多飲品，唔知是否全部都有機呢？

Lawrence

跑馬地Amigo雅谷餐廳

筆者很榮幸地獲一位好友邀請午飯。筆者家住新界，鮮有機會來到跑馬地，完完全全大鄉里出城。午飯時間到啦，立刻衝上的士，好友一口氣講了跑馬地黃泥涌道79號。的士大佬還摸不著頭腦之際，好友立刻補了一句有間餐廳叫Amigo！的的士大佬彷然大唔！差些少成間餐廳歷史講晒我地知！到啦！門外好容易認，有四個拱門，左上角掛起了太陽伯伯裝飾。很是有趣！

一入內，嘩！不得了。那種裝潢同氣派，筆者立刻聯想起上次同Michael San一起去北海道時那間法國餐廳。筆者暗叫”好高級啊！”服務生帶我們上了二樓，梯間掛了很多獎狀，很多擺設。不吃也要看個夠！就連洗手間都有，點都要參觀一下！

安頓下來後，正奇怪為可是三人餐桌，原來好友早早安排了要張大丁點的餐桌，真細心。還未開口問，服務生已收起了一位餐具。服務生送上餐牌，感覺很重、好實在。我們點選了三道菜的午餐。筆者盡可能挑選和好友不一樣的。

餐包先來。法式餐包外皮鬆脆、內裡軟綿。筆者夢寐以求的法包景界！

接著是好友的羅宋湯及筆者的前菜—茄子鴨胸卷。很是意外，好友對羅宋湯的評價是和外邊差不多！哈，咁大鑊！筆者也試了一口，味道確實差不多，但冇外邊的死命雞粉，但牛腩邊味又不太出。

但是人家賣派頭喎！你看領班拿著的道具幾有成意？湯是放在小壺內，臨上桌前再放在此爐火上番煲一下，然後才放在湯碟上奉客。










茄子鴨胸卷呢？茄子軟綿，鴨胸並不太濃味，再加芝士都並不太鹹。好吃！

主菜到啦！所有食物都放在小煎鍋中。筆者本想選鱸魚，但好友選了。冇問題，肉眼吧。領班將所有食品從煎鍋中遂一放在餐碟上。很新奇，伴菜放在另一隻腰果形的碟，再放在餐碟最前瑞。伴菜擺位也講究非常。好友提點著行內術語。”左薯右菜”！ 看著自已的伴菜，左邊的似是一個芝士焗疏菜盒，確實用薯絲做成。中間的西蘭花取其顏色多於一切。最令筆者好奇的反而是右邊那粒家夥。有趣！莫非是原粒蒜頭？非也。原來是小洋蔥。

肉眼要了medium，顏色顯現出美麗的淡粉紅，師傅火喉拿得很準。少少意見是牛排雖有炭火味，但同時混雜著一丁點苦澀味。肉眼味道一般較弱。非戰之罪。

鱸魚呢？筆者只試了一口，算嫩滑。可惜唔覺有筆者最喜愛的燒魚皮。但有都冇用，因此店有個習慣會將所有醬汁加在主菜上。配菜呢？又有得估啦！”左薯”今次清楚看見。”右菜”那些綠色的、長條的就不知什麼。好友先試一口，說瓜，但唔知邊隻！筆者暗笑。到我，吃一口，質感和味道似西芹。我估西芹。最後大家都忍唔住問問領班。原來叫”渦筍”。乜東東呢？原來係油麥菜中間的莖部。

 

最後來的是甜品。拿破崙餅及蛋白檸檬批。拿破崙餅確實優勝。脆皮夠鬆脆，不太甜，如果凍少少更好。

蛋白檸檬批，蛋白如果再軟滑多些少更好。中間那層檸檬冇預期中咁實，個但對於筆者來說就略甜了一些。還有雪糕朱古力波波。

總的來說，價錢雖然是貴了一點，但要在食物上再加上裝潢、服務、排場、氣派、氣氛、再送兩杯餐紅白酒。咁樣計又差不多喎。唯一筆者留意到的是有個領班在上碟的時候，給人有一種”Fing”野落碟的錯覺，我心想可能是午市，改進後會更好！

好多謝好友協助攝影

Lawrence