錦田紅磚屋10號私房菜

筆者首訪紅磚屋10號已是和那些年中學好友聚會。多謝劉董及劉夫人的安排。次訪已是三個月前和屋企人的飯局。相對於各位住港島、九龍的朋友，錦田確實又是一個較偏遠的地方。如果駕車就比較方便。但乘坐交通功具都唔太難。西鐵錦上路站下車。步行10至15分鐘就到。迷路另計。

當天預先訂了張十二人枱，約七時到，人客已滿。事頭婆和太子爺熱烈歡迎。安頓下來和家人談天說地，嘆壺靚茶。之前已和蘇師傅確認了菜單，不用為點菜有半點煩惱。只需講句起得就行了。


首先來的是燉湯一盅，螺頭燉豬展，湯本身非常鮮味、絕對冇味精。但要小心喝熱因非常燙口。由其有小朋友更要小心。可見火侯夠，材料的精華盡在湯中。

第一度菜來了。筆者就叫它紅磚屋三併。左邊的是燒豬頸肉、中間的是冷墨魚、右邊的是燒鱔片。論味道是後兩者較特出。配上自家調製辣汁，確實是一碟不錯的下酒菜。鱔片如厚身少少更好。豬頸肉冇特別其望，但如換了蜜汁梅頭义燒或比個岩鹽燒黑豚你，咁就升格不少囉！

接下來有XO醬炒大花蝦。XO醬是自家製的。好惹味。大花蝦真的很大呀！蝦味相當好，肉質爽口，再加XO醬爆炒，連翠肉瓜都好味。冇得頂。大家不要比筆者呢張相誤道。其實隻蝦已比筆者咬咗一大啖先幾得未影。

再來有七彩炒牛柳片。有紅椒、洋葱、薯條、蘭度和牛柳同炒。味道唔錯，但牛柳如切條會唔會夾一D。

噢！到蒸魚啦！清蒸大燕子星班。筆者喜愛吃魚但偏愛魚味濃一點的，這尾不是那杯茶。但燕子星本身是滑的、冇問題。只是我較愛用魚汁用來撈飯，至正！

再來的有蜜汁燒羊架配椒盬白茄子。這個配搭幾新穎。好有創意！羊架雖然瘦弱左小小，但味道和肉質都搶回不少分數。白茄子也相當不錯，夠鑊氣、唔會喊死你。

還有家鄉釀豆卜。師傳用了濃湯把釀有豬肉的豆卜浸熟。豬肉相當嫩滑。湯頭濃而不喊。但最好的就是那幾粒唐芹，香到不得了！吃到這時如你已飽了的話就大鑊啦，最有驚喜的一度菜黎啦。

其實當我地吃到第二第三度菜的時候，太子己經將呢個缽頭上桌。當時係未食得，要用盬的熱力把它焗熟。約四十五分鐘後就斬件上桌。生熟剛好、色澤好靚、雞味濃厚、香料和酒的味道相當特出！幾於商業秘密不便露。如你和師傅有緣份，他會講給你知。但真的很有水準的盬焗雞！

金湯勝瓜也好味。勝瓜處理得好，冇渣！單尾炒飯更是筆者至愛！粒粒乾身！最特別是加入了好細細粒的芦頭，食得出味道但不易見影踪。師傅刀功同心思都抵讚！

最後糖水也很特別，花旗參燉紅棗元肉。筆者一向怕甜，呢個糖水就令筆者讚不絕口，大家要試。最後食埋生果，是日晚飯就非常完滿結束啦。

後記
1.      大家可以數下一共有幾多樣嘢食左？

2.      XO醬可以一試

3.      店內好多字畫

4.      洗手間寬敞到你唔多信

5.      附近有2個市集可以逛逛
6.      無論環境、食材、廚藝、都有水準！未去過的絕對係你的損失。
7.      但很可惜，已轉手了
8.      蘇師傅今年九月重新出發，快快訂位啦！

  

  

Lawrence