筆者今日終於有幾會和友人到荃灣太記再續前緣。一行四人，搵個卡位，自成一角，談天說地，一樂也。
好在各友人對食冇太大主見，筆者唯有充當小二，推介一番。今次既然有的放夭，不作它選。首選星級巴基斯坦咖哩牛腩、特式秘製三水豉油雞、黑椒牛肉炒拉麵、雲吞麵、同那碗不一樣的清湯牛腩拉麵！招牌野嗎，不吃不可！Part 1已經介紹了清湯牛腩有幾好，此處不再重複。再一人一杯熱奶茶，上次大姐推介的，今次一試！落單時叮囑大姐奶茶要熱D同叫起。
特式秘製三水豉油雞。經過咖哩一役，期望自動調節！哈，世事往往都是這樣的。顏色好吸引，唔係太深色，最緊要層皮唔太油。大家知不知有幾多燒味店為求賣相好，係會在雞皮上掃上一層油增加光澤，多吃無益。雞生熟度剛好，骨是紅的，肉是相當嫩滑，最好的也是筆者一食雞最講究的雞味出期地好，比起好多酒家好。豉油雞汁和薑蔥油都是分開上，值得一讚！筆者最怕碟飯D汁多到濕泣泣、更怕上次有位好友成碟薑蔥油倒在碟飯上。嘩！看得筆者目定口呆！
黑椒牛肉炒拉麵。呢個都係大姐上次推介。一上桌，那股鑊氣直撲入鼻。好香！D煙好似蒸氣咁湧上來。拉麵本身有彈性，軟硬度比湯的要好！黑椒經猛鑊一谷，頗辣！又累筆者吃到滿頭大汗。過癮！
雲吞麵。雲吞麵全部採用竹昇手打！睇得出店主心血之作！絕對有成意！不可不試。麵，本身比一般食開的幼，但韌度就冇咁高。湯，冇太多味精，好。雲吞並不是乒乓波似的。好此道的朋友此處並不是那你杯茶。雲吞最好一啖一粒，不要全部都是蝦，豬肉要有，蝦也要有。再加些少蝦籽，咁就恰到好處啦！
最後，吃飽啦，奶茶到了。熱度相當好，可能大姐分付即沖。杯是用筆者喜歡的瓦杯，茶幾香，幾滑、唔鞋口，有水準。始終，奶茶真係要夠熱才好飲的。
後記
己結業，真的可惜。
Lawrence
沒有留言:
張貼留言